Hilme året rundt

Konsert med Laila Yrvum

I mange bygder i Sør-Noreg – inkludert Valdres – har tatarar/romanifolk gjennom hundreåra reist gjennom, arbeidd, handla og hatt kontakt med lokalbefolkninga. Dei reisande har vore ein del av det historiske kulturlandskapet i Valdres, men det finst lite dokumentasjon på dette i musea. No inviterer vi til dei reisandes kulturkveld - med kulturelle innslag, foredrag og konsert! Kanskje har publikum også minner, foto eller erfaringar dei vil dele? Alle er velkomne!

I Valdres blir det òg konsert med Laila Yrvum. Yrvum har gjennom over 20 år som songar og folkemusikar vore ein av våre fremste formidlarar av romanifolkets kultur. Ho er sjølv frå ei kjend musikar- og kunstnarslekt med røter på Tynset og Nordmøre, og er direkte etterkomar etter kjende spelemenn som Fant-Karl og Spel-Fredrik. Etter debutplata Gia (som tyder «syng» på romani) har ho gitt ut fleire kritikarroste plater, samt boka Viser på vandring, der ho formidlar sin eigen song- og musikktradisjon. Yrvym kjem saman med Leiv Solberg, Oluf Dimitri Røe og Christin Andersen. 

Meir informasjon om arrangementet finn du her: Valdresmusea.

Arrangørar: Valdresmusea, Innlandet fylkeskommune, Hilme året rundt, Taternes Landsforening, kunstnarane Helen Borge Johansen og Hilde Iren Borge, samt andre interesserte i lokalmiljøa
Gratis!

Mamelukk og Barokksolistene: «The Dancers’ Brew» 

Hilme året rundt er glade for å presentere denne produksjonen i samarbeid med Musikk i Innlandet. Med «våre eigne» folkedansar Silje Onstad Hålien (koreograf og kunstnarisk leiar), Anita Vika Langødegård, Brigitte Blomlie og Silje Risdal Liahagen i Mamelukk Dansekompani som saman med Baroksolistene skapar ein ei forrykande forestilling!

I oktober blir det endeleg Innlandet-premiere på The Dancers Brew, ein produksjon med to av Norges ledande ensemble innan sine felt, musikkensemblet Barokksolistene og Mamelukk dansekompani. Publikum kan forvente ei sprudlande blanding av musikalske krumspring og danserisk virtuositet. I «The Dancers’ Brew» blandast tidlegmusikk, folkemusikk og dans i ei magisk og lekande forestilling.

Gjensidig beundring – Nyskapende samarbeid
Då Barokksolistene og Mamelukk dansekompani møttest for et spontant samarbeid Den Ny Opera i Danmark sommaren 2023 fann dei umiddelbart tona. Boblande av gjensidig beundring og inspirasjon har dei no kokt saman eit heilt nytt samarbeidsprosjekt, “The Dancers’ Brew”, der drikkeviser og slåttestev virvlast opp, og musikarar og dansarar smelter saman i ei forestilling full av leik og nyskaping.

Om utøvarane:
Om Mamelukk dansekompani
Mamelukk dansekompani består av sterke, kvinnelege dansaren med en felles kjerne i folkemusikk og -dans. Kompaniet er kjent for si saumlause samanfletting av musikk, dans, tradisjon og samtid. Utforsking av musikalitet, stemmebruk og feminin tolking av bevegelsesmateriale med rot i folkedansen står sentralt i kompaniets kunstnariske uttrykk. Kunstnarisk leiar for Mamelukk dansekompani, Silje Onstad Hålien, er kjent for å gjera folkemusikken og -dansen tilgjengeleg for eit bredt publikum.

Mamelukk Dansekompani: Silje Onstad Hålien, Anita Vika Langødegård,Brigitte Blomlie, Silje Risdal Liahagen

Om Bjarte Eike og Barokksolistene
Bjarte Eike er ein norsk barokkfiolinist som har gjort det stort i utlandet. Gjøvikensaren med ein søken etter å bryte ut av det «klassiske» mønsteret drog til England for å studere og knytte kontaktar. Saman med ensemblet Barokksolistene, som han starta i 2005, har han hatt eventyrleg suksess i utlandet, bl.a. med konseptet «The Alehouse Sessions», som vart til ein film vist i beste sendetid på BBC våren 2023. I 2025 feira Barokksolistene 20-årsjubileum med spennande prosjekt og framføringar både i Norge og internasjonalt. Bl.a. spelte dei konsert saman med Silje Onstad Hålien og Silje Risdal Liahagan i Royal Albert Hall, som en del av BBC Proms.

Barokksolistene: Bjarte Eike (NO) - fiolin, Milos Valent (SK) - fiolin/bratsj, Fredrik Bock (SE) - gitar/charango, Per Buhre (SE) - bratsj, Johannes Lundberg (SE) - kontrabass, Helge Andreas Norbakken (NO) - perkusjon, Steven Player (UK) - barokkgitar, Hans Knut Sveen (NO) - harmonium/ cembalo

Ein fest for publikum
Både Barokksolistene og Mamelukk er kjend for sine energiske framføringar og nyskapande arrangemen, i tillegg til ein eineståande evne til å kommunisere med publikum. Med eit repertoar som spenner frå sarte melodiar frå barokken til pulserande dansemelodiar, lovar dei å skape ein stemning som får både hjarte og føter til å danse.

- I denne forestillinga ønskjer vi å skape ei fortelling rundt korleis musikken og dansen er knytt til sosiale samkome, i det daglege men også i samanheng med livets store hendingar. Samtidig er det viktig for oss at publikum tar del i konsertane, og skjønner at dette faktisk foregår her og no, seier Bjarte Eike, kunstnarisk leiar for Barokksolistene, og Silje Onstad Hålien, kunstnarisk leiar og koreograf for Mamelukk dansekompani.

“The Dancers’ Brew” hadde premiere på Riksscenen oktober 2024, og er vist både under Osafestivalen og Førdefestivalen. Produksjonen er coprodusert av Musikk i Innlandet og Riksscenen. The Dancers’ Brew vann Folkelarmprisen for beste produksjon i 2025.

Foto: Knut Utler

Arrangørar: Musikk i Innlandet og Hilme året rundt

Konsert med Østerlide

Østerlide består av songaren Liv Ulvik, Andreas Haddeland, gitarar og Ulrik Ibsen Thorsrud på slagverk. Når folkemelodiane og -historiene formast på nytt i Østerlide si lydverd får dei nye sjatteringar av fargar, lys og skugge, men er framleis dei same: – Nye og gamle på same tid! Østerlide kler folkemelodiane i nye drakter, av florlette, såre, lyse, mørke, sterke og røffe fabrikat. Skimrande som sol på vatn snor vokal og klokkespel seg rundt drypande perler av gitar. Lyse og eteriske lydbilde avløysast av drivande gitarriff og perkusjon på full guffe. Vi får servert bloddrypande historier frå mørkaste middelalder, mirakel og gjengangar, kjærleik og inderleg himmel-lengsel. I sentrum står som før dei uslitelege og tidløse folkemelodiane som er forma og slipt gjennom århundrer.

«Liv Ulviks svimlande vakre kveding møter det botnsolide kompet Andreas Haddelands strenger og Ulrik Ibsen Thorsruds perkusjon, og saman lagar dei fascinerande og fengslande musikk» (Folkemusikk)

Foto: Thor Brødreskift

Konserten er støtta av Norsk Kulturråd og Innlandet fylkeskommune

Arrangerast i samarbeid med Valdres folkemuseum

Martin Steinum Brun og Silje Onstad Hålien