Strunkeveko

Strunkeveko skal gje barn og unge opplæring i spel og dans, og inspirere dei til vidare arbeid med folkemusikken og -dansen. Deltakarane på Strunkeveko får opplæring i hardingfele, vanleg fele, langeleik, toradar, trekkspel, song, dans med vekt på halling, samspel, dans og uttrykk eller folkedansteater. Dette utgjer kjernen av den folkemusikken og folkedansen me finn i Noreg i dag.

Deltakarane på Strunkeveko skal få opplæring i heile spekteret av den disiplinen dei deltek i (repertoar, teknikk, intonasjon, rytmikk) både i gruppe og individuelt. Undervisningsramma pr. elev er om lag 35 timar i løpet av veka. Elevane blir delte opp i gruppe etter alder og nivå. Dei som tek del i instrumental opplæring eller song, skal i tillegg få undervisning i dans. Kvart år blir det arrangert minikurs der elevane får prøve nye ting. Dette kan vera: innføring i godkarsstykkje og eldre folkemusikkinstrument (td lur, bukkehorn, seljefløyte), scene- og presentasjonsteknikk, dans osv.

Under Strunkeveko skal deltakarane også få øving i å stå fram med musikken og dansen på ei scene. Dei er hovudaktørar på to konsertar; den uhøgtidelege sjokoladekappleiken og den meir formelle avslutningskonserten, som har opp mot 400 tilskodarar. Dessutan skal dei få høve til å spela til dans på dansekveldar både på kursstaden og på Valdres Folkemuseum. Ei anna side ved opplæringa er det å lære og lytte til andre. Deltakarane blir tekne med på fleire konsertar gjennom veka. Alle skal dessutan ta del i danseopplæringa på dagtid og dansen på kveldstid. I tillegg er det også fleire andre aktivitetar gjennom veka, som t.d. fotballturnering, bading, natursti, m.m.

Strunkeveko har vorte den fremste møtestaden i landet for born og ungdom med interesse for folkemusikk og folkedans. Kurset er det største av sitt slag, og deltakarar frå store delar av landet møter opp. Mange av deltakarane kjem att år etter år, og stadig fleire av dei er å sjå og høyre på kappleiks- og konsertscenene rundt omkring i landet etterkvart som dei blir eldre. Det er grenselandet mellom tradisjon og fornying som gjer Strunkeveko til eit så populært kurs.

Strunkeveko har som mål å nytte unge, profesjonelle utøvarar som har pedagogisk erfaring som instruktørar. Mange av instruktørane på Strunkeveko har formell utdanning i folkemusikk og livnærer seg som profesjonelle folkemusikarar eller -dansarar, eller som pedagogar. Dei fleste kan òg vise til sigrar frå Landskappleiken, Landsfestivalen eller nominasjonar til Spelemannsprisen, Folkelarm, Intro-folk e.l.

Strunkeveko blir organisert av ein tilsett og ei styringsgruppe på fem frivillige personar.

Kurset går føre seg i veke 30, parallelt med Jørn Hilme-stemnet. Strunkeveko og Jørn Hilme-stemnet har eit nært samarbeid for å kvalitetssikre begge arrangementa, men dei to er likevel separate arrangement med ulike målsettingar, målgrupper og tilskotsgrunnlag.