Festivalartist 2009: Martin Myhr

Dansaren Martin Myhr frå Trysil, no busett på Torpo i Hallingdal, har lyfta fram den norske folkedansen i mange høve. Han har vore frilans folkekunstnar i nær 30 år, er fleire gonger noregsmeister i halling, og har hatt ei rekke turnear i inn- og utland.

Myhr har hatt om lag 2 300 framsyningar for Rikskonsertane, han er med i dansekompaniet Frikar, og er dansande nisse i Putti Plutti Pott. I 2008 var han «Buskeruds fylkeskunstnar».

Årets festivalartist får du oppleve i opningskonserten «Kjeldo» på Valdres folkehøgskule, som instruktør på Strunkeveko, produsent for konserten «Den so lea se ette gølvé», artist i intimkonserten «Dø og pine, dæ menner i vart fall jæ», og truleg i fri utfalding på dansegolvet både seint og tidleg.